“Gurasoek seme-alabei Jesusen fedea irakasteari deitzen diogu familia-katekesia”
Lau zutabe ditugu eginkizun honetan lagungarri
OHARRA: Beren seme alabak katekesira ekartzen dituzten familien harmonizazioa errazteko asmoz, doako LUDOTEKA zerbitzu bat eskaintzen dugu 2 urtetik 7ra dituzten haurrentzat (beste adin batzuetarako galdetu) eta katekesi bilerekin batera tokatzen diren astearte eta ostegunetan izango da.
Zuen haurrek une atsegin bat pasa dezaten saiatuko gara gune kontrolatu batean eta seguru batean.
2024-2025 Ikastaro hasiera egunak
Añorgako Parrokian izen-ematea ez dutenek egin, hurrengo taulako egunetan egiteko aukera izango dute.
| 2024ko Urria | 1.go maila | 2.go maila | 3.go maila |
|---|---|---|---|
| Karmel Mendiko Andra Mª Parrokia (Añorga) | Urriak 8, asteartea, 18:00 | Urriak 1, asteartea, 18:00 | Urriak 3, osteguna 18:00 |
Katekesiaren 1go Maila
Jainkoa, gure bizitzaren ardatz
Pertsona
Jainkoak maitasun berberarekin sortu gaitu gu guztiok. Guk ere maitasun handiz maitatu behar dugu.
Familia-bizitza
Poztu gaitezen, familia batean jaio garelako, gaur egun dauden familia mota ugarietako batean. Familiak maite gaitu. Jesus ere familia batean jaio zen.
Gure izena
Poztu gaitezen, IZEN bat ere badugulako.
Aita Jainkoa
Kontura gaitezen JAINKOA AITA DELA, AITA-AMA, maite gaituela, eta kristau-elkartearen familia handian zaintzen gaituela.
Bizitza soziala
Beste dohain batzuen artean, zentzumenak eman dizkigu Jainkoak, berak sortutakoaz goza dezagun. Horregatik, zaindu eta errespetatu egin behar ditugu natura, animaliak, pertsonak…
Jainkoak bere indarra bidaltzen digu
Espiritu Santuaren bidez, pertsona hobeak izaten laguntzen digu, lagun hurkoarekiko jokabide egokia izan dezagun.
1go mailako 2024-2025 material berria .pdf-an deskargatu ezazu:
Katekesiaren 2. Maila
Jesusek, parabolen bidez, nola jokatu beharko genukeen erakusten digu
Gaiak modu ludikoan lantzen ditugu neska-mutilekin, baina mezua beti garbi utziz.
| Mezua | Parabola | Laburpena |
|---|---|---|
| Eman zaigun egitekoa betetzea | Dizipuluei dei egin zienekoa | Jesusek pertsona apalak nahi izan zituen bere ondoan, bere egitekoan lagun ziezaioten. Orain, guri egiten digu dei, bere mezuaren jarraitzaile izan gaitezen. Jainkoaren Erreinua lortzen lagun dezagun nahi du, bidegabekeriarik gabeko mundua, denok elkarri lagunduz eta daukaguna elkarbanatuz. |
| Harrera egitea | Bartimeo | Bartimeo bakarrik zegoen beti, baztertuta. Jesus hurbildu egin zitzaion, harrera egin zion, eta bizitza aldatu zion. |
| Jesusekin elkartzeak aldatu egiten gaitu | Zakeo | Juduentzat, bekatari bat zen Zakeo. Baina Jesus handik igaroko zela jakin zuenean, korrika joan zen, bera ikustera. Jesusek, Zakeo ikustean, bere etxera joango zela esan zion, eta hala egin zuen. Ordutik aurrera, Zakeo aldatu egin zen, eta bere ondasunak banatzen hasi zen. |
| Elkarbanatzea | Jesusek ogiak eta arrainak biderkatu zituenekoa | Jesusek elkarbanatzen erakusten digu. Daukaguna partekatuko bagenu, goserik ez legoke munduan. Argi esan zuen berak: “Emaiezue jaten”. Partekatzea betebehar bat da. |
| Otoitz egitea | Aita gurea | Otoitz egitea Jainkoarekin hitz egitea da. Horretarako, konfiantza landu behar dugu haurrengan; lehenik eta behin, gurasoekiko konfiantza, eta, ondoren, Jainkoarekiko konfiantza. Ondo legoke gauean, oheratu baino lehen, familiak otoitza elkarrekin egitea, eta bakoitzak Jainkoari eskerrak ematea egunean zehar gertatu zaion gauza on batengatik. Familiako inork arazorik izanez gero, une egokia izan daiteke hori adierazteko ere. |
| Maitatzea | Mandamentu nagusia | Mandamentu guztien artean, elkar maitatzeko aginduari ematen dio Jesusek garrantzirik handiena. Berak maite gaituen bezala maitatzea da garrantzitsuena. |
| Zoriontsu izatea | Zorionbideak ** | Zoriontsu izateko, nolako jokabidea izan behar dugun esaten digu Jesusek. |
** Zorionbideak, haurrentzako eguneratuta eta egokituta.
XXI. mendeko zorioneko haurrak
2. mailako 2024-2025 material berria .pdf-an deskargatu ezazu:
Katekesiaren 3. Maila
Jainkoarengana hurbiltzeko pausoak
Kristau elkartea (Eliza)
Eliza fedearen izenean elkartutako PERTSONOK osatzen dugu. Eta ez gara perfektuak. Akats asko egin ditugu. Eta GUZTIOK DAUKAGU GEURE ERANTZUKIZUN ZATIA, handiagoa edo txikiagoa, egungo Elizari dagokionez. Denok hartu beharko genuke Elizan parte, nork bere ahalmenaren arabera. Fedea sendotzeko, Kristau Elkartea izan behar dugu oinarri. Fedeak Jesusekin lotzen gaitu; fedeak laguntasun- eta zerbitzu-bizitza izaten laguntzen digu.
Gutako bakoitzak galderak egin beharko genizkioke geure buruari, gogoeta egin beharko genuke, Elizaren eta gure arteko harremanaren gainean: eta nik, zer egiten dut Elizaren alde? Eliza bultzatzen laguntzen al dut? Ala, besterik gabe, nire kontzientzia lasaitzeko betetzen ditut erritu eta errutinak? Denok aritu beharko genuke, denok, senideekin eta Elizarekin lankidetzan, bidean aurrera egiteko.
Sakramentuak
Sakramentu orok ezaugarri hauek dauzka:
- E-BOKATU egiten du, Kristoren misterio salbatzailea oroitarazten duelako.
- IN-BOKATU egiten du, Jainkoaren Hitza entzuten dugulako.
- KON-BOKATU egiten du, Elkartea bere izenean biltzen duelako.
- PRO-BOKATU egiten du, Ebanjelioarekin bat datorren konpromisoa eskatzen digulako, bizimodu bat erakusten digulako, Ebanjelioaren lekuko egiten gaituelako.
Hiru multzotan sailkatzen ditugu sakramentuak
| Hastapena | Sendatzea | Zerbitzua |
|---|---|---|
| Bataioa | Barkamena | Apaizgintza |
| Sendotza | Gaixoen oliadura | Ezkontza |
| Eukaristia |
Hastapena
Bataioa (Jesusen bataioa)
Jesus Juan Bataiatzailearengana hurbildu zen. Haren bidez hartu zuen bataioa Jordan ibaian. Une hori erabakigarria izan zen Jesusen bizitzan, bataioa bere aldaketaren ikurra izan zelako, aldaketaren aldeko konpromisoa. Orduantxe eman zion hasiera bere bizitza publikoari.
Haurra, bataiatuta egon edo ez, JAINKOAREN SEME EDO ALABA da. Bataioaren sakramentua jasotzean, kristau-elkarteko kide bihurtzen da, gurasoen fedearen bidez. Gurasoek haurra Ebanjelioaren balioetan hezteko konpromisoa hartzen dute. Gurasoen hitz, keinu eta jokabideen bidez ikusiko dute seme-alabek gurasoak fedearen lekuko direla. Gurasoek egiten dutenak, gurasoen jokabideak, askoz ere balio handiagoa du haurren begietara, katekistak esaten dienak baino.
Sendotza
Nerabeak berretsi egiten du bere gurasoek bataioaren egunean hartutako konpromisoa: Ebanjelioaren balioen arabera bizitzea, mundua bidezkoagoa bihurtzeko ahalegina egitea, berdintasunaren alde jardutea, ahulenen alde, injustizien aurka… Azken batean, Jainkoaren Erreinuaren alde egitea.
Eukaristia
Eukaristian, Kristorekin eta Kristau Elkarteko gainerako kideekin bat egiten dugu. Irakurgaietan, Jesusen hitza entzuten dugu, eta barneratzen, gero gure egunerokoan haren arabera jarduteko.
Sendatzea
Barkamena
Jainkoak barkamena ematen digu eta aitarik onenen moduan hartzen gaitu beti. Jainkoak beti barkatzen ditu gure okerrak.
(*) Aita Onaren eta Emakume adulteraren parabolak lantzen dira.
Biatikoa edo gaixoen oliodura
Oliadurak indarra ematen digu gaixoaldian eta beste bizitzarako igarobidean.
Zerbitzua
Apaizgintza
Elkartea zerbitzatzeko konpromisoa hartzen duen kristau gizonezkoa da apaiza. Elkartea zuzentzeko, bideratzeko eta biziberritzeko egitekoa hartzen du bere gain.
Elkartearen zerbitzura egoten dira. Gogora dezagun oinak garbitzearen ekintza.
Ezkontza
Sakramentu honen bidez, bikotekideen arteko maitasuna bedeinkatzen da. Kristau Elkartearen aurrean, elkarri lagunduz eta errespetatuz bizitzeko konpromisoa hartzen dute.
3. mailako materiala .pdf-an deskargatu ezazu:
Gomendatutako irakurketak
“JESUS, HURBILKETA HISTORIKOA” – JOSÉ ANTONIO PAGOLA
Nazareteko Jesusen bizitzaren eta mezuaren kontaketa bizia eta zirraragarria. Jesusen irudi historikoaren inguruan egin diren ikerketek posible egin dute azken urte hauetan estudio garrantzitsu eta zoragarriak argitaratzea. Azken ikerketa serio eta berrienetik abiatuta, Jesusen pertsonarengana hurbiltzen gaitu Pagolaren liburu honek, zehaztasun historikoa eta aurkezpen garbi eta eskuragarriarekin konbinatuz.ontent.
“JAINKOAREN DESPISTEA” – DIEGO NERIA
Diego Neriaren autobiografia da, gizon honek egoera sozial krudel eta tradizio gogorren garaian, ez zuen onartu baztertua izatea ezberdina zelako, bere fedeari uko egitea, bere patua etsipenez onartzea. Gaur esan dezakegu bera izan dela historian zehar lehen transexuala Aita Santu batek harrera on bat egin diona, Frantzisko Aita santuak hain zuzen. Diegok esku bat luzatu nahi die bera bezala benetan direnak izateko adorea izan nahi duten guztiei.
“RAZONES DESDE LA OTRA ORILLA” – JOSÉ LUIS MARTIN DESCALZO
Liburu honen bidez bere “arrazoiak” ematen dizkigu beste ertzetik: fedearentzat, esperantzarentzat eta maitasunarentzat arrazoiak. Ale honetako testuak egilearen eta irakurlearen arteko komunikazio sutsuaren adierazgarri dira. Horretaz gain, adierazi nahi dute gune argitsuak aurki ditzakegula giza abenturan eta beroiek begiak altxa eta etorkizuna esperantzaz begiratzera gonbidatzen gaituzte. Kazetari bezala, José Luis Martin Descalzo laurogeita sei artikulu hauetan zehar sufritzen duen giza arimaren txokoetan sartzen da, eta hala eta guztiz ere, itxaropentsu dago.
“JESUSEN BERROGEI PARABOLAK” – GERHARD LOHFINK
Jesusen parabolak literatura unibertsalaren parte dira. Kontaketa hauetan, sarritan probokatzaileak, gertuagotik ezagutzen dugu Jesusen ingurua. Kolore ugariko mundua da, penaz eta pozez betea, egunerokotasunarekin eta festekin, abenturekin, krimenekin eta gizatasun sakonarekin.
“PRINTZE TXIKIA” – ANTOINE DE SAINT ÉXUPÉRY
Frantsesez idatzitako liburuen artean gehien irakurria eta itzulia izan da. Bere idazteko moduarengatik haur literatura bezala hartzen da askotan, baina bizitzaz eta giza izaeraz gogoeta oso sakonak ere baditu.
“ESPERANTZARAKO ARRAZOIAK” – JOSÉ LUIS MARTIN DESCALZO
Denbora dezente daramat Matía Calvoko Lugaritz eguneko zentroan meza ematen hilero lehen ostiraletan. Bertako erizain batek eskatu zidan ea etika eta erlijioa lantzen duen liburu interesgarriren bat aholkatzen nion. Hau bera iradoki nion. Idazlearen zale bat naiz. Lehen, “ arrazoiak beste ertzetik” aholkatu nizuen.
Idazle hau aurkeztu nizuenean, esaten nizuen bere obretan bazegoela “gauzak esateko halako modu dotore bat eta konbentzitzen duten arrazonamenduak”, Jose Mari Javierreren hitzak erabiliz. Jose Luis, sinestedun eta apaiz, gaurko munduan esperantza hiltzen ari dela zioen eta etsitakoei agertzea mundu honetako giza abenturak dituen gune argitsuak ere, ahalegin zoragarria da bere ustetan.
“ASEKAITZENTZAT ESPIRITUALTASUNA” – JOSE MARIA CASTILLO
Idazle hau Granadan jaio zen; teologian Doktorea da. Joan XXIII Teologoen Elkarteko gobernu batzordeko sortzailea da eta kidea. Liburu mordo bat idatzi du.
Gaur egun, erlijioak zalantzan jartzen dira hainbat ikuspuntutatik eta espiritualtasun koherente baten gero eta behar handiagoa sumatzen da egoera berri hauetan. Jose Maria Castillok espiritualtasun sendoa bat bizitzeko modua aurkezten du, eta hori zoriontasun gose-egarriari uko egin gabe eta mundu hobe bat sortzeko ideala ahantzi barik.